Matthew XIII 24-30

Heofona rice is geworden þæm menn gelic þe seow god sæd on his æcere. Soþlice, þa þa menn slepon, þa com his feonda sum, and oferseow hit mid coccele on middan þæm hwæte, and ferde þanon. Soþlice, þa seo wyrt weox, and þone wæstm brohte, þa ætiewde se coccel hine. Þa eodon þæs hlafordes þeowas and cwædon:

'Hlaford, hu, ne seowe þu god sæd on þinum æcere? Hwanon hæfde he coccel?'

Þa cwæþ he: 'Þæt dyde unhold mann.'

Þa cwædon þa þeowas: 'Wilt þu, we gaþ and gadriaþ hie?'

Þa cwæþ he: 'Nese: þylæs ge þone hwæte awyrtwalien, þonne ge þone coccel gadriaþ. Lætaþ ægþer weaxan oþ rip-timan; and on þæm riptiman ic secge þæm riperum: "Gadriaþ ærest þone coccel, and bindaþ sceaf-mælum to forbærnenne; and gadriaþ þone hwæte in-to minum berne."'